【體路專欄】四處也覺冰冷，衝超路上步步困難，獨自渡過千億個夜晚。經過一年多的離別，「細佬」終於平安回來了，今次回來的身份由中甲球員升格變了中超球員，一切都是他的努力換來的成果。作為哥哥的我，無論他的職業身份如何改變，他永永遠遠都是家中幼兒或我的弟弟，回來一刻的擁抱勝過千言萬語，這刻的溫暖溶化了過去的落寞和冰凍。
在去年的12月22日，原本是細佬最接近回家的一次，可惜梅州客家在95分鐘絕殺對手，直接取得衝超資格，令浙江隊需要出戰升班附加賽，意味著細佬最快一月中才能返港。天意難逃，最終他整個2021年都未能在香港渡過半秒，究竟他的心路歷程是如何？
大佬：成為中超球員是怎樣的感覺？
細佬：感覺好唔真實，因為喺我腦海中幻想過幾千次，況且唔係每一個人都能夠實現兒時夢想，能夠征戰中超真係真係好開心。
大佬：衝超過程最難忘的事是甚麼？
細佬：其實整個過程都好困難，特別疫情之下需要多次以「泡泡」形式比賽。最難忘一定最後一秒鐘被梅州絕殺同附加賽完場哨子聲嘅一刻，因為嗰一秒就係夢想破滅同實現嘅一刻。
大佬：2021年沒有回來香港，最想念的是？
細佬：最想念一定係家人，因為自己有少少自私選擇外流發展嘅道路，犧牲咗好多同佢哋相處嘅時間，當中受傷縫針嘅一次都令佢哋好擔心。
大佬：有沒有說話想跟家人說？
細佬：雖然大家相處時間大大減少，不過身在外地嘅我每一刻都感受到佢哋嘅支持。每一場比賽佢哋都會睇哂，無論贏同輸都會為我加油。特別想多謝哥哥，自己都忙都不得了之下都處理家中所有大小時務，照顧好爸爸媽媽令我可以好專心去追夢同踢波。
大佬：回港後最想做的事情是？
細佬：最想陪伴家人多啲，因為上年錯過哂佢哋嘅生日慶祝，希望可以利用呢段時間好好同佢哋相聚一下。
大佬：如果能夠時光倒流，你依然會選擇加盟浙江隊？
細佬：一定會，我從來唔會為自己嘅決定感到後悔，並且喜愛挑戰自己。希望未來可以繼續挑戰自己，同球隊一齊創下更多更多美好嘅時光。
大佬：今季最大難度？
細佬：我短短效力梅州半年時間，又要再短時間內適應一個全新嘅球隊，並且要交出成績絕對唔容易。慶幸球隊上下及教練團隊幫助自己好多，令自己能在球場上發揮自己應有嘅水平。
大佬：下季有機會同樂仔、Vaz一齊踢中超，有咩感受同期望？
細佬：當然係好興奮，希望會有更多香港球員外流，不只是中國聯賽，令香港足球發展得更加好。
大佬：港隊有咩期望？
細佬：希望自己可以為港隊出戰更多比賽，作最大貢獻，因為代表香港隊係香港球員嘅夢想。
期望港隊有新教練領導之下，球員盡快適應新嘅打法，闖出一番新氣象。
此篇文章由「體路 Sportsroad」最初發表於「【體路專欄】久違的擁抱 衝超的細佬」