【體路專欄】今年筆者特地邀請「阿軒的籃球天地」粉絲專頁版主張鼎軒（下稱軒仔）的明星賽心選，皆因筆者深知軒仔對NBA見解有其獨特性，每次撰文也有一定粉絲支持，如果在十年前，以軒仔的能力，要成為其中一本台灣雜誌NBA的專欄作家一點也不難。可惜在今時今日，不要說NBA雜誌快將成為歷史文物，連報章及網媒也縮減人手，又有多少位置讓新一代人上位呢？
西岸明星隊：
Rudy Gobert （爵士，13.3分＋13.4籃板）
Nikola Jokic（金塊，26.8分＋11.8籃板＋8.6助攻）
Karl-Anthony Towns（木狼，22分＋12.5籃板）
Luka Doncic（27.2分＋9.6助攻＋8.9籃板）
Demar Derozan（20.1分＋6.6助攻）
東岸明星隊：
Trae Young（鷹隊，26.6分＋9助攻）
Bradley Beal（巫師，34.8分＋4.6助攻）
Julius Randle（紐約人，22.6分＋10.9籃板）
Domantas Sabonis（21.6分＋12籃板）
Joel Embiid（76人，28.6分＋11.1籃板）
邱益忠：我發覺我同你撞咗兩個心水啵，軒仔！Rudy Gobert同Nikola Jokic！
張鼎軒：係呀，真係估唔到你揀Gobert，點解Gordon你會選呢兩位呢？
邱益忠：我選Rudy Gobert，係因為今年佢被人批評為「兩億水貨」，甚至成為湖人名宿O’neal嘅大力批評對象。但個人覺得，爵士作為小市場球隊，願意比一份5年2億美金嘅合同，絕對係一個大鼓舞。Rudy Gobert係法國隊主力同上年入選明星賽，封波能力一向穩陣，加上入行八年未射過一次三分波，係聯盟極少有嘅純種藍領中鋒，佢高薪留低，對爵士嚟講係有力奪冠嘅保證。
張鼎軒：咁你覺得Gobert值4,000萬美金一年？
邱益忠：爵士覺得值就一定值，比錢係爵士唔係其他人。當然要我老實講，Gobert年薪比較合理係喺2,500萬一年到3,000萬一年左右啦。係啦，我又想知你點解選Nikola Jokic？
張鼎軒：其實係開季既時候，金塊陣容磨合不佳，好多球員都幫唔到手。係孤立無援嘅情況下只有Jokic 獨力支撐，令到佢球場判斷力比上季更上一層樓，甚至有機會以場均28分嘅姿態問鼎MVP！咁你呢Gordon？
邱益忠：我選Jokic最主要原因佢嘅技術層面係現今中鋒最犀利，感覺係配上助攻同策劃視野嘅Dirk Nowitzki！但…點解你會選Towns呢？
張鼎軒：Karl-Anthony Towns係其中一個經常比人忽略嘅基石球員，講真一句，有Towns就有灰狼隊，無Towns就哈士奇。
邱益忠：哈哈！明白明白。我就選咗火箭Christian Wood，佢有少少似當年TMac一由速龍轉會到魔術時，即刻由一個無人關注嘅五線球員，變為明日之星，而且要留意未喺James Harden轉會前，Wood已經有呢個好表現！6呎10吋高，有外線有步法，勁好J！
張鼎軒：係幾好J㗎！可惜佢上一場傷咗……
邱益忠：唉，受傷大家都唔想，不過，我就估到你果然會選Luka Doncic，話說當年因為你喺Doncic未打NBA前已經深度分析佢會成為NBA球皇，就係個篇文同段片令我同你成為朋友。
張鼎軒：果時真係比較花時間去研究NBA新秀，好多野要前輩們多多指教。Doncic今年防守勁咗，獨行俠外線又差咗好多，又係獨挑大樑嘅球員，咪投比佢囉。
邱益忠：明白明白，咁選馬刺Demar Derozan嘅原因係？
張鼎軒：馬刺轉為以年輕人作核心的球隊，Derozan喺球風同球權今年有大轉型，更加公正無私同毫無怨言，效率又提升咗，單係咁就足以入選全明星啦！唔好笑我選Demar Derozan，你咪又係盲選Stephen Curry！
邱益忠：擺明啦！作為超級Fans，我只能講Curry改變全球籃球員打法，令到任何人都要識射三分波，可以話係前無古人。但又好諷刺，Curry又未做到主罕NBA嘅地步，佢未有大帝LBJ個種霸氣，好想Curry可以贏多一兩次冠軍，證明自己！
張鼎軒：不過之前聽你講你唔係好憎Chris Paul咩？今次點解破例選佢？
邱益忠：確實我唔算係CP3 Fans，但好佩服呢位老油條去邊隊就令邊隊升Level，而且佢屬於比較傳統、以助攻為樂嘅嘅Point Guard，買少見少啦！你試下如果有新仔只傳波而減少起手三分，會唔會比教練狂炳？
張鼎軒：講完西岸講東岸，我就選咗我好中意嘅Trae Young同Bradley Beal，Trae Young唔多講大家都知道佢「買犯」同進攻能力又提升咗，Bradley Beal長期得分榜第一名，雖然巫師長期輸波，但佢嘅得分能力值得肯定嘅
邱益忠：其實我都中意佢兩個，但我想玩冷門，選咗Collin Sexton同Fred Vanvleet，前者上年我以為只係水貨，但無諗過佢一打一能力好強，嗰場對網隊嘅比賽，完全征服咗我，好有少年出英雄嘅熱血Feel，希望唔係一季行情啦！至於Fred Vanvleet喺2019年決賽打爆我愛隊勇士，初時諗緊會唔會曇花一現，但最近以73.9%命中率射入個人生涯新高54分，同時成為速龍史上最高得分球員同落選選秀最高得分球員，令我諗起當年活塞名宿、2004年FMVP嘅Chauncey Billups，兩個人打法都係實而不華。
張鼎軒：講到實而不華，不得不提溜馬Domantas Sabonis，事實上，Sabonis係我所有選嘅球員中，表面數據有進步，但進階數據稍跌嘅球員。因為溜馬新教練Nate Bjorkgren上任後採取更激進嘅攻防戰術，而Sabonis喺進攻方面嘅責任大幅增加，擋拆、低位單打、策應傳導嘅戲份亦大大增加，因此我選Sabonis算對他嘅一種支持，希望佢打得更好啦！至於紐約人Julius Randle嘛，呢位前湖人小將已經成為紐約人攻防兩邊不可或缺嘅球員，比你選嘅Gordon Hayward有過之而無不及囉！
邱益忠：等等先，其實我都唔係美國隊長嘅Fans，初時都覺得黃蜂比成三千萬美金，仲要簽4年，以為籃球之神Michael Jordan又入錯貨。但美國隊長真係一個好好嘅明星級團隊成員，佢可以幫助年輕隊友喺新式籃球下，Clint Capela呢類射程短、無三分能力嘅傳統中鋒好難出頭，上年被火箭扔去鷹隊，以為職業生涯係咁先，點知入到一隊需要佢超強防守能力嘅球隊。唔敢講佢已經同鷹隊名宿Dikembe Mutombo同一個Level，但愈睇愈似！
張鼎軒：我選Joel Embiid係因為佢係明星嘅層面上再進步咗，換咗教練後三分穩定咗更開發埋中投嘅能力，令76人戰績好睇好多，無理由唔選佢啦！係呢，咁多明星球員偏偏唔選，點解Gordon你會選Kevin Durant嘅？
邱益忠：選Kevin Durant始終覺得佢受傷後復出依然打到明星級表現絕唔容易，如果只講中距離同得分手段，可以話係天下第一人。但要贏到大帝LBJ，最起碼贏多兩三次冠軍，都唔係一件易事！呢次訪問非常好玩，大選擇嘅明星球員八成唔同，而筆者年紀年過三十，不時講某某新球員有退休球員嘅影子，真係老啦。希望下次再次同「阿軒的籃球天地」交流NBA比賽心得！軒仔亦係一個謙遜有禮、願意學習嘅年輕人，希望將來會有媒體搵佢做專欄作家！
文：愛情運動公關gor邱益忠（AASFP運動公關、NBA專欄作家）、張鼎軒（阿軒的籃球天地）
此篇文章由「體路 Sportsroad」最初發表於「【體路專欄】NBA明星球員心水」