【運動員網誌】香港 101-200 高山，高度 263-399 米，分佈港九新界，以及南丫島與赤柱對開海域的螺洲。
早在去年疫情期間，運動場所關閉，很多工作受影響，就在那段時間觀看了日本人 Yoki Tanaka 的 Great Traverse Japan（下稱 GTJ）紀錄片，他花了 208 天由日本南端出發一腳過（用獨木舟橫渡海峽）全程走了 7800 公里，攀登日本最高的 100 個高山，去到北海道。
受到他的啟發，我在去年8、9月也用類似的方法攀登香港 100 高峰，在那次的經驗裡，我意識到雖然我跑山已經有一段日子，但原來我有很多地方都沒有去過，甚至可以説「我不認識香港」。
完成 100 高峰之後，見到有行山組織較早之前在網上發佈的200及300高峰列表，所以就襯今次空檔，每逢週末就背著露營用具，順道當作未來挑戰美國 Appalachian Trail 的訓練，去探索 101-200 高峰。
先由大嶼山北端汲水門大橋起步，經花瓶石頂過愉景灣，去梅窩到老人山，走東涌道經墳場上石獅山、禾寮墩。
最有趣是，我自己一個行上去搵唔到路，又唔敢在墳場內亂闖，正打算放棄落山之際，有一家五口有老有嫩行上來話去石獅山，橫豎都來到再一次同佢哋上山一齊搵路。
去到唔見有路，阿女話「係呢個方向架啦！」，阿爸（60有7）隻身衝入草叢爆林，之後著住拖鞋的孫仔亦跟住我地一齊爆，果真高手在民間！
東涌經昂坪去獅山，過牙鷹山到大澳搭船去屯門，大嶼山段，算是最簡單輕鬆，又少爆林路段。
去到屯門，由於天氣太熱，過花香爐頂之後打算去流浮山補給，但原來行人係不能通過堆田區範圍的。唯有出返龍鼓灘補給再上山。
青山腹地浮砂碎地，如要前往請大家做好準備穿適當衣履；杯靈雙渡的山徑越來越爛，加上剛過去不久火燒圓頭山，山野面貌經已面目全非。
公庵山、雞公山、牛潭山更被越野電單車玩到變「喇喱「，我經常主張「連自己的遊樂場都唔保護，我哋仲邊度有得玩？」
面向深井的桃坑桐都係一個好靚的地方，但上花山就唔係想像中咁易啦，因為果一帶小路縱橫，又多墳墓，樹叢較矮，我揹住 full pack 50L 背囊，唔方便周圍穿，所以到最接近的山頭就離開。
向東北區進發前先到青衣三支春，咁大個人第一次到訪已即時被它的美景吸引，回望汲水門大橋，又可飽覽昂船州大橋一帶景色。
經孖指徑向北路過流水響水塘，順便欣賞紅葉，爬龍山、禾徑山，望住新界北堆填區就快高過一座山，真心希望我哋可以為下一代守護住地球。
頂住大太陽高溫上芬箕托落三椏涌，再走環湖鹿湖峒至跌死狗，再走返出鹿頸，現在先至覺得香港真係好大，走咗咁耐先至走咗 50 高峰；現在更加覺得，自己有好多地方未去過，越睇得多，更加覺得自己越渺小。
COVID 雖令到世界（仿忽）停頓，但我們絕對不能夠令自己停下來，反而更應利用這個機會好好做自己想做的事情。
（下集再續）
此篇文章由「體路 Sportsroad」最初發表於「香港超馬運動員黃浩輝網誌：Great Traverse Hong Kong 2（上）- 我不認識香港」