【體路專欄】天氣轉冷，大家要著夠衫先去跑步呀！
朝早慢跑我會以「洋蔥式」著法去跑，上身打底著件長袖Nike Pro，再著件長袖加風褸，下身著長tight，跑暖咗除風褸綁喺腰，跑完即刻著返保暖，拉筋時唔好吹親，又或返到屋企先拉筋。
跑課表嘅話熱身可著外套長衫長褲保暖，熱好身會換短褲（個人唔習慣著長tight練跑），上身著定短袖喺入面，可加手袖，跑到熱先除長袖，練完著返哂衫cool down，用毛巾抹汗換返乾淨衫褲，唔好凍親。
冬天練跑的確要帶幾多衫，按個人需要可加手套同帽，如果大風可加布口罩遮蓋口鼻，免得直接吸入凍空氣。
祝大家聖誕快樂、身體健康！
文：香港跑手屈旨盈
此篇文章由「體路 Sportsroad」最初發表於「【體路專欄】寒冷天氣下的跑步裝備」