【體路專欄】港超聯上星期正式開鑼，部分青年賽事亦陸續展開，雖然我自己唔能夠親自帶隊，不過從部份家長口中得知一個你聽完都會「吓」一聲嘅情況。當日其中一場比賽我嘅「仔仔」面對舊東家，足球術語即係「倒戈」，每當佢一有波喺腳嘅時候，場邊對方後備球員就大叫：「二五仔……二五仔……」，呢個情況維持到佢被調離場，個人認為必須嚴明正視，這種球場內歪風絕對係零容忍！
球員品德要重視 教育工作認清啲
教練係球隊中一個榜樣同模範，基本上所有嘅灌輸同行為反射，球員都會透過五官照單全收，潛移默化之下，確實影響深遠。眼見己隊學生向前隊友如此說出攻擊或侮辱說話，作為教練應當即場指正及阻止，而非任由年青球員向他人作人身攻擊，足球要學習的除了技術，還有球品。
青年球員喺成長階段除咗要面對隊內競爭之外，周邊一舉一動都會直接牽動球員思想，產生羊群效應。仲記得自己喺年青球員階段嘅時候，身邊有隊友會受朋輩影響而缺席訓練，又或者只要有牽頭者，就會有其他人跟隨。話晒都仲係小朋友，佢哋會覺得有人帶頭點解唔跟？這個年紀，未必懂得自我分析及深入判斷對錯。
嗰場其實都仲有一段小插曲，喺比賽尾段個波出咗界，屬於領先一隊嘅家長竟然將個波再踢遠啲……其實對於呢個年齡層嘅小朋友，比賽勝負唔應該係最重視一環，比賽過程、球員自身表現及經歷等更為重要。有時候輸波都係一種成長，青年球員要學懂經歷高與低，如何面對自己過錯及失敗，從錯誤中學習，成為一個更有質素嘅球員。
教練、家長等長輩角色在年青球員成長的過程中都是非常重要，必須傳遞正確訊息同觀念，引領球員喺健康道路成長，請各位教練、家長都能做好身教。
此篇文章由「體路 Sportsroad」最初發表於「【體路專欄】球員高叫「二五仔」 教練漠視零容忍」