【體路專欄】等咗好耐，港超聯賽事終於開放俾球迷入場！作為球員坦白講感覺有啲陌生，話晒真係好耐無試過喺球迷面前踢比賽。而有球迷入場嘅感覺就好似……你無見一個朋友10幾20年，一見返大家都唔使講嘢所有回憶都湧現出嚟，就係呢種感覺，真係好正。
踢波總會有過錯 尋求解決無得拖
自從足總（香港足球總會）宣布容許球迷入場後，電話好耐無出現嘅留波飛訊息不停彈出嚟。去到比賽當日，其實去到熱身同出場前一刻先再次意會到：「啊，原來今日有球迷！」今場比賽我繼續踢中堅位置，比賽頭10分鐘我哋尚算主導形勢，正當準備入局之際，對方兩次突如其來半解圍長傳，自己對落點預判出現誤差及身體對抗輸蝕情況下，間接令對手得到兩次進攻機會，好彩隊友幫忙化險為夷。成場比賽流流長，總有啲時候出現犯錯，問題在於能唔能夠即時搵出解決辦法。其後成場比賽我再無出現同類型犯錯，完場一刻除咗同自己講句well done之外，感受到自己又再成長咗少少，因為我喺比賽裡面搵啱解決方法，又可以記錄在案，日後作為參考例子。
經驗球員比青年球員場上表現更具穩定性，因為佢哋跌得多碰得多，過去嘅沙場經驗話俾佢哋知危機四伏之餘，更加話咗比佢哋知應該點樣拆解危機。人生入面你的而且確可以失敗好多次，比起願意失敗，我認為勇敢面對失敗係更重要。當你鼓起勇氣面對自己錯誤，面對自己不足之處，你會發覺其實好難受，好想逃避。但係只有你直接正視過錯或弱點，先可以搵到解決辦法，杜絕重蹈覆轍。
此篇文章由「體路 Sportsroad」最初發表於「【體路專欄】港超球迷有波睇 球員表現唔會曳」