【體路專欄】上周六在波蘭參加世界半馬拉松錦標賽，今次跑到PB特別有意義，疫情最嚴重嘅時候，跑步都要帶口罩，為咗繼續練習，教練會車我去啲山旮旯地方練跑，又試過天未光跑喺吐露港跑，Gym room無開嘅時候去平台花園俾蚊咬住做訓練，但依啲嘢阻唔到我要練習嘅決心，堅持下去先會見到希望。賽前做5000m 同10000m time trial 都有狀態，以為難關已過，可以安心跟隨大隊（有偶像潔貞）去波蘭比賽，點知…….
原定航班係由香港飛去荷蘭，荷蘭轉機去波蘭，到機場先知喺荷蘭轉機需要出入境，並須政府領事館簽證，雖然我哋持有大會發出嘅證明文件，但係都不被接納。 幾經波折，臨時重買機票，先飛去倫敦，轉機去波蘭首都華沙，再轉內陸機去大會指定機場，飛咗10幾20個鐘再搭45分鐘車終於到酒店，先做檢測，等咗1個鐘出陰性結果，可以休息了！
賽前2日嘅天氣都係陰天，好多雲，不時落雨，近沙灘條路仲大逆風，可能搭長途機原故適應跑時對腳仲攰攰哋，好彩一到比賽就醒醒定定俾我按教練計劃嘅配速完成任務！
因為疫症，大會喺今次比賽都落咗唔少功夫，一到機場有防疫包（內有口罩，消毒紙巾同消毒酒精），選手有限定training and warm up area，其他地方都須戴口罩，膳食大會安排喺酒店餐廳，拎嘢食要戴口罩同手套，當然食嘢就除口罩啦。比賽當日喺酒店分批roll call, 全程戴口罩，call完就要比賽裝束出去起點（天氣都有啲凍，想著件便利雨衣出去都唔得），距離開跑仲有10分鐘就除口罩準備起步，跑完返終點工作人員會派口罩即刻戴返。
第一次參加世界賽雖然好多波折，但能夠見識點樣喺疫症下搞世界賽，遇上唔同國家嘅跑手，自己更更更努力多十萬倍先得。返香港後要隔離14日，雖然參加一個比賽賽要離家21日，但今次經驗同能夠成功突破自己，一切都值得！關關難過關關過！
文：香港跑手屈旨盈
此篇文章由「體路 Sportsroad」最初發表於「【體路專欄】世界半馬拉松賽後感 「關關難過關關過」」