【體路專欄】經歷409日漫長球季港超聯畫上句號，最終由傑志奪得聯賽冠軍，大有機會直入來屆亞洲聯賽冠軍盃（亞冠）分組賽，東方龍獅就奪得足總盃冠軍及聯賽亞軍，同樣獲亞洲賽資格。受到疫情影響，球季曾兩度停擺兼有球會退賽，對球隊老闆、教練、球員等所有足球從業員一啲都唔容易，感謝各方努力，大家合力衝破難關，完成最艱難嘅一季！
疫情停擺 狀態亂晒
全世界足球聯賽受疫情影響曾經停擺，復賽後好多球員表現有所下滑，究竟球員角度喺停擺之下有咩困難要面對？正常情況下一個球季會有一次pre-season，大約6星期備戰主要分為兩階段，由開頭無對抗性（non-competitive period）到有對抗性（competitive period），前者主要集中球員個人力量、速度、爆發力、肌耐力等地方；後者開始涉及身體接觸，埋身肉搏有對抗，以至球隊戰術演練，令球員狀態由低推至最高。不過，受到疫情影響球隊需要暫停場上訓練，即使球員喺屋企保持訓練都只能勉強符合無對抗性階段，維持最基本體能狀態。
當距離真正復賽只得兩星期準備，球員角度嚟講的確較難適應，首先係球感，除咗單純講盤、傳、控、射基本觸球感覺外，傳波速度、距離同角度真係要練返一排先有一定感覺。其次係位置感，喺唔同情況之下，你應該喺咩位置出現，對個波嘅落點、隊友位置距離等總會有啲誤差。最後就係比賽狀態（game fitness），足球場上除咗跑得仲要撞得，齋跑唔撞得，或者齋撞唔跑得都唔係好事，畢竟足球混合多種元素，我認為兩項元素係要共存！所以，大家真係唔好怪球員復賽之後狀態有好大起跌，唔係咁易㗎。
富力退出港超聯 球員去向成關注
臨近開季前港足出現壞消息，富力（香港）足球有限公司於星期三（14日）下午宣布富力R&F由即日起退出香港超級足球聯賽。對球員嚟講，毫無疑問絕對係一件壞事！富力R&F過去一直投放巨額資源，除咗為球員提供機會及人工外，更重要係為香港球市帶來正面競爭，刺激周邊球隊調升資源及改善配套。其次，香港球員較缺乏外流出闖經驗及念頭，富力營運模式令球員體會箇中難處之外，唔多唔少都會增加球員「希望外流」嘅意識。例如梁諾恒及陳俊樂，加盟富力後獲得踏上中超及中甲機會。無可否認，論球會設施及配套，香港仍然有好大進步空間，而球員從細到大應該更積極進取，以衝出香港為首要目標！總括而言，對於球員嚟講，富力嘅存在係利多於弊。
球會減少，球員增加，供過於求係現時球員面對情況，換言之會有部分球員面臨失業。球市好與壞，同幾多老闆願意投資有莫大關係之餘，球迷支持同為重要！疫情下大家同心合力共渡難關，疫情後當然期望球場重開，各位球迷可以入場支持，繼續團結一致，齊心合力撐起港足！
此篇文章由「體路 Sportsroad」最初發表於「【體路專欄】疫情有態唔容易 共渡難關撐住先」