【體路專欄】頭四周英超一共踢咗38場比賽，各隊合共炮製144個入波，平均每場出現3.79個入球，自1930/31球季來，英格蘭最高級別聯賽入球比率最高！講到入波，上星期一定唔少得曼聯同利物浦兩場比賽，紅魔鬼主場以1：6大敗俾熱刺；紅軍作客亦爆冷以2：7大敗俾阿士東維拉，成為英超史上首次有兩隊同日比賽失多過6球或以上。曼迷同利迷終於可以連成一線，今次真係YOU’LL NEVER WALK ALONE！
防線大地震 表現唔穩陣
當球員表現唔好嘅時候，總會受到外界批評或產生自我質疑，究竟自己係咪唔夠好？究竟自己係咪唔可以再進步？曼聯上場28分鐘有馬斯亞被趕出場，雖然大部份時間踢少一個，但前鋒被趕出場理應對防線體系影響唔算最大。可惜嘅係中後場球員持續暴露不穩定問題，隊長哈利麥佳亞連番失誤首當其衝，中場普巴缺乏防守意識，「性格踢法」表現極度飄忽，影響整體防守架構。紅魔鬼最大嘅問題係中後場欠缺緊密度及互相補位支援，敵人輕而易舉撕破防線。
至於利物浦上場失利有3個失波都係來自省中人改變方向，可以話運都輸埋。不過，一場比賽失7球絕對有莫大改善空間。領隊高普鍾意將防線移前進行高位壓迫，左右二閘推至高位，只有法賓奴及兩位中堅留守喺後場，當面對敵方直接長傳急攻顯然狼狽，未能穩陣地駕馭。因此，紅軍可謂成也高位壓迫，敗也高位壓迫，要適當地控制防線深度，控制前場壓迫時機，以防止敵方球員容易地產生反擊機會。
球隊補強最終買 疫情金錢唔亂嘥
喺轉會窗死線前夕，各隊盡最後努力收購目標。曼聯最終未能如願簽入辛祖增強右路實力，不過，得到前鋒卡雲尼及左閘泰利斯加盟，總算能夠提升個別位置實力。此外，今季未嘗一敗嘅愛華頓對症下藥簽入中堅葛菲，進一步提升陣容平衡性。至於另一單矚目收購非阿仙奴莫屬，轉會市場關閉前32分鐘出價啟動湯馬斯4,500萬鎊買斷條款，以彌補被外借嘅根度斯及杜利拉，更可以為施巴約斯及兵工廠防線帶來更好保護。今季英超球隊總共花咗12.5億英鎊，最多嘅係車路士（2.26億鎊），最少嘅係般尼（零），究竟邊個能夠成為英超半程冠軍？
此篇文章由「體路 Sportsroad」最初發表於「【體路專欄】英超入波停不了 轉會死線不停Deal」