【體路專欄】球迷係足球嘅根，球迷係球隊最強後盾，球迷係球員最大推動力。喺點評同分析今周英超之前，我希望藉此機會感謝一位本地波忠實擁躉：「Ricky，雖然你走得好突然，感謝你一直以來對本地波嘅支持同付出，感謝你場內場外噓寒問暖，為我加油打氣。天意弄人，疫情影響之下遺憾地未能同你食『說好的晚餐』，但願你喺另一個世界繼續追尋夢想，邊睇波邊飲啤酒，安息吧！」每次當有身邊人離開，總會提醒自己珍惜眼前人，珍惜身邊同擁有嘅一切。
榜首三隊三連勝 狐狸拆「城」就最醒
今周英超有唔少驚喜戰果，西布朗半場領先車路士3：0但最終被迫和3：3，繼2011年韋斯後，車路士成為首支半場落後3球嘅球隊能夠追和對手。至於3支榜首球隊利物浦、李斯特城及愛華頓繼續有穩定演出，分別擊敗阿仙奴、曼城及水晶宮。當中李斯特城對曼城比賽獲得三個12碼，而曼城幾個失波來自類近情況。由於曼城經常能夠控制比賽及主攻，防線會移得較前及暴露較多被進攻空間（可參考圖3及圖6），李斯特城球員利用曼城防線身後空間，嘗試「走身後」後上入楔（可參考圖3至圖6）直入心臟地帶。從圖中可以反映曼城防線有兩大改善地方，首先係左右兩閘卡爾獲加及賓祖文文迪與中堅位置相距太開（可參考圖3及圖5），其次係一對中堅艾歷加西亞及尼敦艾基並不處於最適合包抄位置。曼城賽後隨即宣布以6,500萬鎊由賓菲加買入中堅魯賓迪亞斯，領隊哥迪奥拿自上任後淨計後防都用咗4億英鎊買人，相當誇張！
球證判決有冇錯 VAR做主角
講到今星期主角，繼續係視像助理裁判（VAR）！喺曼聯對白禮頓比賽出現戲劇性一幕，主球證卡雲拿響起完場哨子後，VAR主球證西蒙賀柏示意曼聯最後一擊角球過程中出現疑似12碼（Possible Penalty-Handball），最終經過覆核情況下曼聯獲判12碼。根據IFAB VAR手冊8.13條例（可參考圖7）球證做法實屬正確。
按入連結VAR手冊第28頁
至於另一場比賽熱刺對紐卡素踢到下半場補時階段，紐卡素前鋒安德魯卡路爾一次頭槌攻門頂中同時跳起嘅迪亞（可參考圖8），結果主球證班斯再三覆核下判罰十二碼，最終卡林威爾遜射入雙方打成1:1平手。過去我哋一直談論手球主要依據手部咩位置接觸足球、手部有無貼近身體軀幹及球員身體動作係咪自然。今屆IFAB及英超賽會定出最新指引方便球證定奪，但究竟新指引係咪適合，仍然有待觀察！
此篇文章由「體路 Sportsroad」最初發表於「【體路專欄】感激過去一直支持 心中回憶永留彼此」