【體路專欄】英超入波停不了，球迷睇到好有FEEL！第二輪英超焦點賽事利物浦以2:0擊敗車路士，後備入替嘅泰亞高艾簡達拿創出英超半場最多傳球次數（75次）。至於另一亮點係孫興民同哈利簡尼，前者成為史上第1位亞洲球員喺英超大四喜；後者則成為史上第1位單場為同一位入球球員交出4次助攻！講入波點少得卡法路雲，對西布朗連中三元帶領球隊大勝5：2！頭8場聯賽合共炮製39個入球，平均每場4.9球，自英超成立以嚟星期六及日加埋最多入波紀錄！嗱，開心嘢就講咗好多，如果要講到今星期最失望球隊，非曼聯莫屬！
紅魔進攻歎慢版 撕破密集好鬼難
曼聯對上一場正式賽事係8月17日歐霸盃四強對西維爾，基本上一個月時間絕對唔足夠俾球員得到充分休息。不過，疫情影響實屬意料之外，對水晶宮前夕只能安排一場友誼賽，球員狀態顯然不足。喺比賽策略（Game Planning）上，大概都會預知水晶宮採用穩守突擊，紅魔鬼大部份時間面對密集防守（可參考下圖），最需要係快速轉向，透過轉向將對方防守球員左右轉移，把握轉移時所產生嘅錯誤，變成當刻進攻優勢。反觀比賽過程當中，球員並無透過跑動為自己或隊友製造進攻空間，好多時候依靠個人能力單打獨鬥，將整個進攻節奏拖慢，令球隊陷入困境。
攻守轉換有點慢 面對反擊追唔返
作為一場比賽主攻球隊，經常會面對兩個問題，首先係球隊有無既定進攻套路撕破對方嚴密防線；其次係後防會有好多被反擊空間，如何堵截或破壞對方踼快速反擊。曼聯今場比賽完全唔能夠解決呢兩個問題，上文已經提到點解唔能夠擊破敵方防線，而面對快速反擊時，球員攻守轉換反應緩慢，往往都係後知後覺，結果要全速奔跑40至50米回防（可參考下圖）。原本奔跑回防係預期內發生嘅情境，但若然每一次都出現相同情況，證明中前場球員搶截位置及效果唔理想，欠缺保護令防線備受壓力。值得一提嘅係，哈利麥佳亞速度不高，連迪洛夫預謀能力較低，令紅魔鬼踢主攻情況之下難以制衡對方快速反擊。
現今足球非常體力化，球員需要具備良好個人技術之外，更需要具備一定對抗性及足球智識。究竟紅魔鬼仲需要幾多時間先能夠重整球隊，今周相繼贏波嘅愛華頓、利物浦、曼城及李斯特城能唔能夠持續強勢？
此篇文章由「體路 Sportsroad」最初發表於「【體路專欄】英超上演入球Show 曼聯表現好糟糕」