【體路專欄】相信好多跑手跑馬拉松時都會食Power gel補給，毫無疑問Power gel方便攜帶，進食容易，一包大概100-120 kcal，能快速即時提供充足熱量。
食邊款Power gel好個人，有含咖啡因、支鏈胺基酸（BCAA）、鈉、維他命C等等，要透過平時練習時自我感覺邊款幫到自己，人哋話呢款好俾到力/唔抽筋……最好親身試過先知！補給唔一定要食gel，葡萄糖同運動飲料都能夠做到迅速補充，揀得啱好重要，免得引起腸胃不適。
如腸胃比較敏感，可採取少量多餐嘅補給方法，一次食半包，每30’-45’補給一次，讓身體有充分時間去消化，唔會造成負擔。另外，如大會提供嘅運動飲料係自己平時飲嘅口味也可作補給。
一般比較理想嘅補給時機係馬拉松比賽開始咗60’左右，呢個時候肌肉負擔未算好大，體內肝醣都未耗盡，作出補給啱啱好，喺第一次補給後，再每隔45’-60’補充一次，俾身體有多啲時間去反應，也可避免消化不良
溫馨提示：
建議根據自己身體嘅反應和消化時間、賽道起伏、當日天氣和當時身體狀態來按需要補給，跑馬拉松中途有好多變數。Be smart and finish strong！
文：香港跑手屈旨盈
此篇文章由「體路 Sportsroad」最初發表於「【體路專欄】馬拉松比賽時食啲咩？」