【體路專欄】跑馬拉松之前，跑手們都好努力好俾心機做一件事──加碳，旨在將身體入滿油，減低比賽時「撞牆」同抽筋嘅機會。
碳水化合物係長跑最需要嘅能量燃料，進食後消化系統會將食物中嘅碳水化合物轉化為醣原（Glycogen），~75%儲存喺肌肉 ~25%儲存喺肝臟。好多時跑到攰係因為體內醣原耗損，醣原負荷法（Carbo-Loading）係透過有技巧地進食，令體內醣原水平喺賽前達到最高，延長比賽時燃料供應嘅時間。
我嘅做法係比賽前一星期開始慢慢減少訓練量（強度同里數都會），同時慢慢增加每日碳水化合物攝取，我比較重視最後兩、三日，研究指出應進食每公斤體重 7-10g嘅碳水化合物，以50 kg女跑手來計，即等於350g – 500g，相當於 7-10碗飯嘅份量。
參考資料︰EP Fitness & Health 運動科學 【醣原負荷法】提升半馬和全馬表現 12-1-2018
文：香港跑手屈旨盈
此篇文章由「體路 Sportsroad」最初發表於「【體路專欄】醣原負荷法（Carbo-Loading）」