【體路專訊】中超大連賽區第二輪今日（30日）上演「廣州打吡」，有港足中場陳俊樂繼續正選兼踢足全場的廣州富力以0：5不敵上屆冠軍廣州恆大，遭遇二連敗。
陳俊樂在上場對深圳佳兆業首度正選並上陣78分鐘。雖然表現一般，但主帥雲邦賀斯仍繼續對「樂仔」寄予厚望，繼續安排他正選夥拍張功及比利時國腳丹比利。面對衛冕球隊恆大，富力甫開賽已受壓，僅7分鐘就被對方隊長保連奴左腳抽射破網，加上韋世豪完半場前5分鐘飛身撞入右路傳中，落後2球完半場。陳俊樂上半場續任進攻中場，但位置比上場稍為「𢭃」後，亦有一次強行突破入禁區射門省中對手。
換邊後8分鐘，恆大左閘高准翼扭過唐淼後右腳勁射成3：0。唐淼8分鐘後再犯錯，禁區內以右手擋下對方傳中球，泰利斯卡操刀射入十二碼。陳俊樂於71分鐘一次入楔中意外踢到飛剷的對手，被球證出示黃牌警告。完場前，恆大的入籍中國國腳艾克森射入罰球，助球隊最終淨勝富力5球。富力下仗將於下星期三迎戰河南建業。
較早前另一場，深圳佳兆業有後備上陣的戴偉浚完場前搏得十二碼，但仍以2：3不敵上海申花。
此篇文章由「體路 Sportsroad」最初發表於「【中超】陳俊樂踢足全場 富力「廣州打吡」大敗而回」