【體路專欄】經過咁多集場區球員類型介紹，唔知各位球迷有無更加清楚知道自己踢法同特性，又或者搵到最合適學習對象未呢？嗱嗱嗱，諗多陣好啦，根據政府最新指引，下周一起，室外運動場喺不違反限聚令下重新開放，意味各位波友好快可以踢！波！啦！趁呢個時間，不如諗吓每個位置對你有影響球員。對我嚟講，有影響嘅定義係自己最佳學習對象之餘，喺嗰個位置上對比過往作出重大改變。
門將—迪基亞
講到迪基亞，你會諗起「冬甩事件」定係佢每一下精彩撲救？過去年代，球迷對守門員要求大多着眼喺上路(腰間以上)及下路(腰間以下)撲救能力、反應敏唔敏捷、迎接兩邊傳中球能力及封單刀波能力，主要以呢4大範疇去判斷係咪一個好守門員。不過，隨着科技進步，人類亦步向盡善盡美，對守門員要求再唔單止局限防守能力，對球隊進攻上亦要有一定貢獻。迪基亞自小受5人足球薰陶下，腳下功夫份外了得，場上用波能力媲美場區球員，令防守球員受壓下更有信心回傳俾佢，從而繼續保持控球權，因而迪基亞成為球隊場上第一進攻策動點。
・準繩側身平飛長傳，不禁令人諗起雲達沙。（Photo Credit: AMA Football Youtube Channel）
．接應隊友會轉，轉方向亦係迪基亞其中一項工作（Photo Credit: AMA Football Youtube Channel）
用腳救波
當然，單靠用波能力呢個論點絕對唔夠說服力，雲達沙、拉爾拿、域陀華迪斯等早已證明用波能力較好嘅守門員係非常吃香。我認為迪基亞比其他門將最特別之處係主張「用腳救」下路波！普遍守門員面對下路波會主張橫身落地用手波，不過，迪基亞將5人足球把關技術套用落11人足球上，面對較近距離射門，以腳代手進行撲救，理論上大大節省咗身體由空中向下跌時間，因此提升撲救成功率，但呢項專門技術並非人人能夠套用，關鍵在於守門員本質腳步靈敏度及習慣性。正因如此，唔係人人做到嘅時候，迪基亞開創先河，完美展示「用腳救波」足以說服我佢係The Special One！
．早前對熱刺比賽迪基亞用腳救咗3個關鍵入球，最終令曼聯能夠保持勝局（Photo Credit: Manchester United Youtube Channel）
．單對單冷靜地面對前鋒，靜待時機出腳撲救，談何容易（Photo Credit: United News Youtube Channel）
除咗上述論點外，深信有睇開英超嘅球迷都會見證迪基亞成長，由初黎報到身體對抗質素薄如紙張，變成今日面對高空波十拿九穩；由開頭撲救永遠撲橫俾人執雞，變成有方向性撲救防止敵人執雞；由起初面對單刀波步法凌亂，變成有節奏有效率步法移動去撲救，每一項細節進步，造就咗今時今日世界上最佳門將之一嘅迪基亞，加加埋埋呢幾個論點，夠說服力啦掛哈哈！
此篇文章由「體路 Sportsroad」最初發表於「【體路專欄】每個位置球員多 影響你有邊一個－門將」