【體路專欄】隨著疫情蔓延到歐洲各地，歐洲各大足球聯賽相繼暫停，此時此刻，生命可貴再次彰顯於人前。歐洲足協早前決定將歐洲國家盃順延到2021年6月舉行，美洲國家盃亦延期至明年上演，更表明希望所有球會級別賽事，包括聯賽、歐聯及歐霸在6月30日前完成。時間在變，足球都在變，過去10至15年間對球員要求不停改變，因而令每個位置出現唔同類型球員。比賽尚未重開之時，我會連續幾星期同大家分析一下，究竟同一位置上可以擁有咩類型球員，第一集打頭陣係中堅位置。
傳統型——高甸、基亞連尼
防守球員顧名思義傾向集中防務工作，傳統型中堅特質較重視個人1vs1能力，對球員制空力、攔截力及位置感要求較高。球員自身意識形態著重保護自己防守區域，因而位置感會較強，每每喺最有利防守位置出現，而每次防守以解圍作為最終目標。最後，球員大多數係隊中精神領袖及防線統領者，場上猶如教練一樣指揮隊友，但整體用波能力則較差。
體力型——拜利、高巴貝利
體力型中堅特質擁有強橫對抗性，以身體質素戰勝對手。球員普遍擅於踼「埋身戰」，不惜氣力對進攻球員窮追猛打，藉此利用自身力量限制敵人，令進攻球員大部份時間處於被動狀態背向自己。不過，凡事有辣有唔辣，體力型中堅面對速度及靈巧型進攻球員略為輸蝕，對被踼「盲眼位」及「身後波」卻較難以招架。
技術型——邦奴治、碧基
時移世易，防守球員唔單止淨係踢走個波，需要嘗試成為球隊第一策動進攻點，因而出現對技術型中堅嘅需求。技術型中堅漸漸成為現代足球主流，球員特質需要具備良好傳控球技術及技巧，當中涉及視野及閱讀球賽能力，而意識形態上近似一位中場球員。當防守時，球員唔單止希望破壞進攻，更要同時觀察進攻隊友位置，一旦成功搶截就馬上策動進攻。不過，喺防守心臟地帶策動進攻總有風險，隨時失去控球權後導致失波，即係大家俗稱踢「高章波」，甚至係「孤寒波」。
完美型——沙治奧拉莫斯、雲迪克
話明係完美型，梗係樣樣都盡善盡美，不論個人能力，以至團隊配合都係完美無瑕，不過要成為完美型必須具備以下兩個特質，就係場上決定性（Decision Making）及穩定性。球員個人技術、身體質素、戰術意識等全部都可以透過鍛煉而提升，不過，場上決定性可以話係從錯誤中學習，但能唔能夠學以致用就係另一回事；穩定性同心理質素有直接關係，能夠長年累月保持高水平演出係一門非常高深嘅學問。
心水清嘅球迷就會知道，以前有一類中堅叫清道夫（Sweeper，包抄型），作為防線最後一人，主要負責包抄工作，但問題在於若然長時間要求一位球員留守最後，確實未能好好善用場上人力資源。正因如此，清道夫角色漸漸變得唔重要，甚至現時近乎無再出現。足球變化萬千，即使同一位置都可以擁有唔同演繹方法，最重要係球員清楚了解自己強項同弱項，優點同缺點，展示自己最強一面，減少暴露較弱一面。
此篇文章由「體路 Sportsroad」最初發表於「【體路專欄】同一位置類型多 究竟你會學邊個 — 中堅篇」