【體路專欄】曼城上周六被歐洲足協裁定喺2012年-2016年其間違反財政公平原則，禁止參與歐洲賽事2年！雖然會方表明上訴，並立即同球員召開緊急會議，但藍月亮未來仍然充滿無窮變數。暫且唯一不變嘅係，中場大腦大衛施華早前確實下季離隊，結束曼城10年球員生涯。
唯獨施華一個是不可給取替
夕陽無限好，只是近黃昏。正踏入球員生涯最後階段嘅34歲大衛施華，效力曼城10年期間上陣超過400次，踢289場英超比賽取得200場勝利成為史上最快達成呢項成就嘅球員，而近10季英超合共創造出768次入球機會及以89個助攻成為助攻王。除咗本身傳控球技術及技巧出眾外，令大衛施華與別不同嘅地方係擁有更優秀閱讀球賽能力及決定性！
圖二：大衛施華除咗等於好波，亦同致命傳球（Killer Pass）劃上等號（Source: ManCity Official Youtube Channel）
喺曼城既定4-3-3陣式及戰術下，基於單防中費蘭甸奴或洛迪靴南迪斯偏向防守留在中後場，出任靠左進攻中場嘅大衞施華有更大自由活動空間，嘗試喺敵方防線與中場線之間遊走。除咗牽制敵方球員外，可以喺危險進攻地帶控球，直接為隊友鋪橋搭路產生更具威脅性攻勢。不過，喺防務工作上，球隊戰術非常著重攻守轉換效率，當前場失去控球權後要馬上重奪控球權，對球員體力要求甚高。然而，對年紀漸大嘅大衛施華而言難以應付，整體效率下降間接令曼城未能喺場上保持最大優勢。
圖三：大衛施華周不時後上殺入禁區入波（Source: ManCity Official Youtube Channel）
讓晚風輕輕吹送了落霞，大衛施華對曼城嘅貢獻的確無人能夠取代。曼城今季嘅防守穩健性下降，轉會市場重開後需尋求新中堅加盟；球隊進攻上逐漸失去銳利感，不能單單依靠迪布尼及阿古路。哥迪奧拿必須審視及考慮不同戰術方針，以迎接未來賽程。
此篇文章由「體路 Sportsroad」最初發表於「【體路專欄】褪色藍月亮 警號正敲響—進攻篇」