【體路成都直擊】5日前在米蘭取下世錦賽團體銅牌的張家朗，帶住疲累身軀飛到地球的另一方，摘下港隊在成都世大運的第3面金牌，創下新一項歷史。縱使世大運不計算國際劍聯（FIE）排名積分，但張家朗依然付出了他的全部，出戰這項生涯只得一次的世大運，「推動到我嘅係爭勝心，我唔鍾意輸，唔可以輸蝕畀對手，一定努力去衝，畀晒所有力落去。」
兩個月前的廣州集訓之中，張家朗不慎弄傷右手，當時正是備戰亞錦賽，也對來年的奧運資格至關重要，接下來更是全年最大型的世錦賽。即使服用止痛藥紓緩後上陣，惟未能延續上屆個人賽銅牌的佳績，卻驚喜地在團體賽打出大爆發，聯同蔡俊彥、楊子加及梁千雨突破重重難關，包括連續迎戰世界前三隊伍之下，仍然能奪下香港劍隊首面世錦團體賽獎牌。
今站家朗再次服止痛藥上陣，但手腕間中仍作痛，他又透露因為時差關係，導致今站賽事比平常更累。本來他預計決賽對手同樣疲累，因此心態一度放鬆而落後，「以為對手都好攰，諗住放鬆少少嚟打，但點知佢係做足準備。既然佢準備到咁，我都唔可以輸蝕畀佢，同自己講唔可以咁㗎，上到嚟一定要頂埋佢！」
不論在心態、比賽及調整三方面，家朗自評在今季打出歷來最佳表現，「今季嘅我算係PB（Personal Best），有其中3站世界盃可以攞獎，亞錦賽有啲可惜。有啲調整時間之後攞世錦賽前8，雖然冇得延續上屆銅牌甚至更好，但總括嚟講算係職業生涯最好成績。中間有唔少波折，覺得自己打得唔好，始終近年對自己嘅期望多咗，但可以重新調整到，係一件好有成功感嘅事。」從心態上，家朗深明運動員需要學習與傷患共存，但要真正實踐也是另一回事，也許這是他從奧運冠軍過後的最大課題。
從此在他的獎牌櫃裡，又增添一面意義難忘的金牌。
成都世大運港隊獎牌（截至8月4日）
3金：武術男子太極劍（許得恩）、女子重劍（佘繕妡）、男子花劍（張家朗）
1銀：武術男子南拳（劉子龍）
5銅：武術男子太極拳（許得恩）、女子棍術（沈曉榆）、乒乓球女子團體賽（杜凱琹、蘇慧音、林依諾、吳詠琳、李凱敏）、乒乓球混雙（何鈞傑、杜凱琹）、男子花劍（蔡俊彥）
成都世大運劍擊賽程
8月5日 男子佩劍、女子重劍團體賽
8月6日 男子重劍、女子花劍團體賽
8月7日 男子花劍、女子佩劍團體賽
圖、文：李子正
此篇文章由「體路 Sportsroad」最初發表於「【成都世大運直擊】五日內兩創港隊歷史 來自張家朗的冠軍級堅持」