【體路專欄】英超上周末曲終人散，要留嘅留，要走嘅走，所有名次都塵埃落定。疫情影響之下各支球隊征戰頻密，現階段所有職球員終於可以唞一唞，為下一季做準備。呢個時候，等我為大家總結一下今季英超，同埋對部份球隊作出點評。
前4位置已定奪 衝擊歐聯做目標
利物浦最終以99分封王，接近完美姿態奪得首個英超冠軍，球隊若然要延續勝利優勢，必須加強中場及翼鋒板凳深度，以作為法賓奴、文尼及沙拿替補。亞軍曼城絕對需要增加前中後三線實力，今季中堅位置缺乏適合人選，直接影響後防表現；大衛施華及辛尼先後離隊，削弱球隊攻擊能力，預料霍頓及馬列斯增加上陣機會，但幾線作戰，必須要增加兵源調配。車路士無驚無險奪得來季歐聯資格，早前經已宣布簽入射手添姆雲拿及翼鋒施耶治，只要收購合適防守人選，來季球隊必定極具殺傷力及威脅。紅魔鬼復賽前後踢出19場不敗佳績，成功超越李斯特城趕上前4尾班車，中堅、右翼、進攻中場及前鋒係球隊收購主要目標，下季曼聯表現絕對值得球迷期待。
中游球隊較失望 重整旗鼓勿再慌
熱刺、狼隊、阿仙奴、愛華頓以至韋斯咸今季表現都令球迷失望，論班底、球員個人能力及球隊整體性絕不遜色。不過，足球奧妙之處就喺呢度，即使每個位置都能夠坐擁世界上最佳球員，但係都有機會踢得唔好同輸波。熱刺摩連奴上任後踢法變得更加實際，但受傷兵影響無法維持球隊表現；狼隊繼續盡顯黑馬本色，但球員質素有限未能更上一層樓；阿仙奴改由阿迪達上任後重現華麗踢法，但攻守表現仍然有待改善；愛華頓及韋斯咸未能搵到最佳戰術及陣式，安察洛堤及莫耶斯必須加強球隊戰鬥力。
般尼茅夫上訴中 降班或未成定局
降班區域方面，諾域治、屈福特及般尼茅夫力挽狂瀾之下仍然未能逃過降班厄運，當中般尼茅夫僅以1分落後阿士東維拉。正因如此，現階段般尼茅夫積極上訴早前阿士東維拉對錫菲聯比賽中，因門線技術失誤而導致阿士東維拉嗰場比賽奪得重要1分。若然最終能夠推翻呢1分，般尼茅夫同阿士東維拉將會同分之餘，般尼茅夫以較佳得失球反壓阿士東維拉升上第17位，換句話講，降班嘅會係阿士東維拉！姑勿論結果如何， 3支降班球隊今季防守表現差勁絕對係事實，若然最終上訴失敗，亦唔能夠怨天尤人。
漫長嘅一個終於完結，疫情之下今個年度對大家都係非一般體驗，不過，關關難過關關過，明天一定會更好。英超新一季將會喺9月份開始，各位球迷唔好忘記8月份仍然有歐洲賽事，究竟歐聯同歐霸盃冠軍花落誰家，大家都拭目以待。
此篇文章由「體路 Sportsroad」最初發表於「【體路專欄】英超今季終落幕 球隊表現有起落」