【體路專欄】德甲開波喇！上個週末大家係咪坐定定喺屋企睇波呢？頭三位拜仁慕尼黑、多蒙特及慕信加柏順利贏波，當中「魯爾區打吡戰」多蒙特輕描淡寫以4:0擊敗史浩克04，完全係技術性擊倒。講到入波，又點可以唔睇前鋒夏蘭特，佢真係名副其實「機會唔使多，一有就入波」嘅射手，咁唔知係過去歷代，邊一位前鋒對你最有影響性？
前鋒：朗拿度
論現今球壇， C.朗拿度同美斯肯定係世界上最佳前鋒，單從每季入球數字及穩定性，足以證明佢哋唔係浪得虛明。不過，對於我來講，我認為前巴西國腳朗拿度係最具影響性前鋒。朗拿度屬於天生射手，憑着驚人爆發力及細膩技術，喺唔同位置為自己製造入球機會。佢最特別之處在於身體結構上具備與別不同嘅流暢性，每一次由上身帶動下身嘅假動作都係完美無瑕，不論身體平衡性、擺動幅度、變速時間都非常精準，即使不斷重複練習亦未必能夠達到呢個水平，情況就好似已故殿堂巨星Michael Jackson將音樂同舞蹈融為一體，身體隨風擺動嘅節奏感真係想學都學唔到。
．由中場開始爆入禁區，避開接近6名防守球員再射入，世界上有幾多個球員能夠做得到？ Photo Credit: Half Time Youtube Channel
關鍵時刻就入波，不敵傷患最坎坷！
朗拿度初出道已經喺巴塞隆拿打響名堂，19歲奪得世界足球先生，高速個人突破、左右腳精準射術、單人匹馬獨闖龍潭已經成為佢嘅招牌。不過，1999年朗拿度比賽中被踼至膝蓋粉碎性骨折；2000-2001年球季傷癒復出但上陣僅7分鐘便再一次觸傷舊患，右膝十字韌帶完全斷裂，短短幾句足以反映朗拿度生涯高低起跌。經得起歷練，朗拿度一次又一次以實力同表現征服球迷，那怕巴塞隆拿時期「交換波衫事件」；國際米蘭時期右腳兩度斷腳；皇家馬德里時期「脹爆」身型示人；AC米蘭時期左腳斷腳，朗拿度每一次單對單扭過守門員、1扭4單刀射入、左右插花變速射遠柱等等，每一個動作，每一個入球，都令每位球迷記憶猶新。
．以上係朗拿度如何將身體同假動作融為一體嘅最好證明。Photo Credit: Half Time Youtube Channel
朗拿度曾經講過：「C.朗拿度去訓練因為佢喜歡訓練；而我去訓練因為我需要訓練！」的而且確，C.朗拿度憑着後天努力，從不間斷嘅訓練逐一打破人類極限，單論入球數字同表現穩定性都比朗拿度有過之而無不及。但係，如果講到純正前鋒係禁區內外為自己製造入球機會，我認為朗拿度比C.朗拿度更為優勝。更重要嘅係，C.朗拿度2.0係有機會透過培訓而誕生，但朗拿度2.0就只能祈求上天安排出現下一個。
此篇文章由「體路 Sportsroad」最初發表於「【體路專欄】每個位置球員多 影響你有邊一個—前鋒」