【體路專欄】受到新型冠狀病毒影響，康文署早前宣布轄下所有設施暫停開放至2020年3月2日，香港足球總會其後對本地賽事作出對應安排，當中將菁英盃改喺賽馬會香港足球總會足球訓練中心以閉門作賽方式進行，而中銀人壽香港超級聯賽賽事暫定3月份重新展開。若要平衡及顧及各方面考慮因素，閉門作賽或者係唯一解決方法，如果以第一身用家球員角度去睇，又會係點？
草地質素算係高 踢得太密難叫好
有留意Facebook嘅球迷，可能會睇過有訓練片段流出，明顯見到皮球喺空中「非常穩定地」被吹走。作為球員，首先會留意草地質素，由於平日將軍澳訓練中心真草場使用率較低，正常情況下，草地質素比其他球場優勝。喺2月11日比賽前夕滂沱大雨，但比賽當日場地並無任何積水，表面草地濕滑但底蘊頗硬，著膠釘波砵落場都得。不過，到2月14日再次比賽，當日風和日麗草面較乾，球場因為幾日內使用次數急速上升，令唔少位置出現「光頭」現象，變相同平時其他比賽場地並無太大差異，失去將軍澳訓練中心最值得自豪嘅地方。
吹啊吹⋯⋯讓這風吹
除咗草地質素外，球員第二最關注係風速問題。由於球場極度空曠引致四面橫風，對球員判斷皮球落點有較大誤差，風速令球速隨時遞增或遞減，更嚴重嘅係會完全改變皮球軌跡，直接影響球員場上判斷性，包括控球、傳球、皮球落點等，對守門員嚟講會係難上加難。凡事都有辣有唔辣，風速問題會對球員表現有所影響，但同時令自由球更具威脅性，順風時分分鐘令皮球趨向球門，喺更危險位置出現。最後，球員當然會關心球迷可否入場嘅問題，現階段疫情仍然處於水深火熱情況，我同意以個人安全為重。
撇除場地理想與否 箇中問題更加多
正如上文提到要「平衡及顧及各方面考慮因素」，首當其衝會係職員同球員合約，大部份合約都喺5月31日完成，若然聯賽無限期推遲，咁合約到期嘅時候點算？係咪單純可以將合約順延？其次，若然暫停所有比賽，球會願意支付有薪假期？反之，球員願意接受無薪假期？再者，如果現時將所有比賽一刀斬，直接完季，所有球會及球員願意以現時成績作為最終排名？原定足總盃冠軍可以取得來年亞洲賽席位，又如何處理？
講到呢度，有咁多衍生嘅問題，可能睇緊嘅你，都不禁講一句，不如照踢算啦，照踢照進行所有比賽，所衍生嘅問題應該係最少，最容易達成共識。面對呢場逆境波，一啲都唔容易踢，最重要嘅係我哋團結一致，衝破難關！
正如黃子華曾經喺一個演唱會做嘉賓講過，大局為重⋯⋯
此篇文章由「體路 Sportsroad」最初發表於「【體路專欄】閉門作賽將軍澳 共渡難關GoGoGo」