【體路專訊】香港網球新星黃澤林（Coleman）喜事停不了，繼上周六贏得越南網賽男雙冠軍後，返回西班牙拿度網球學校又收到一份「驚喜禮物」── 與剛剛榮升做爸爸的「校長」拿度（Rafael Nadal）苦練3小時！ Coleman坦言「終於恨到」，更獲「偶像」大讚「打得非常好」！
黃澤林今年1月底勇奪澳洲網球公開賽青年組男雙錦標，賽後獲得西班牙傳奇球手拿度嘉許，後者當時更「相約」Coleman練波，惟雙方之後各自四出征戰，一直未能赴約，直至昨日（11日）「校長」終於兌現承諾，與「弟子」在網球學校室內場對練足足3小時。黃澤林事後在社交平台「晒」出與拿度及其教練莫亞（Carles Moyà）的合照，以及練習實況短片，並寫上：「好開心同好榮幸今日可以同我偶像苦練3小時，我會繼續努力，希望有一日可以係（喺）比賽場上相遇。」
能夠與22項大滿貫得主、傳奇球王對練，Coleman受訪時坦言有「終於恨到」的感覺：「梗係好開心啦，始終由細到大睇佢，我打波都係因為佢。」他透露3小時練習過程非常充實：「所有嘢都有練，正手、反手，基本上噏得出都有。最初我都幾緊張，但習慣咗之後就好好多。拿度嗰種氣場簡直係恐怖，佢每一球都好重旋，每次都令到我要退後，真係名不虛傳。」
Coleman又說：「我有問佢，我今日打成點？佢話非常好，練到唔想停！拿度仲問我，廣東話嘅『多謝』點講，之後就照住跟我講，哈哈！而且多謝我邀請佢嚟香港。」黃澤林透露仍會在網球學校練習多一個星期，才轉赴印尼參加職業巡迴賽。
此篇文章由「體路 Sportsroad」最初發表於「【網球】「終於恨到」同拿度練波 黃澤林：佢氣場簡直恐怖！」